Katta Beel
Katta Beel, jekon Chimite ineba minga, uan Ampati songni, Salgipeng-Salaram jolo donggipa song, Nogorparao donggipa, tom·tomgipa diggi damsa ong·a. Chimite diggi, jeni ki·tik brian apsan ro·a aro apsan apalachim, uan bigha 80mangnigita apala. Nie nike ma·sie ra·anigitade, iako saoba bilakgipa aro man·e cha·gipa mandesa cho·e tariaha ine nikna gita man·a, maina, ki·tik brion uara name tarigimin itachi, anne tarigimin diggi ong·a. Chimite diggio, aiao inmangipa agana man·gijagipa a·sel ong·anirangkoba nikna gita man·aha, jeon, uni chi rikkamo, tala batirango boli on·e donatgenchimode, tala batirangara diggi jatchiona an·tangtang balboange, unoni arara ong·e chi rikkamona balpakpilba·rongachim. Uni song wilwilao donggipa manderangba, Chimite rikkamni bol pangsako den·on, ua den·gimin boloni an·chi dake, ja dokmangna gitchake jokako niktokaha. A·chikrangde Chimiteni jatchio sangkni donga ineba bebe ra·a. Aganritingbaanigitade, Rengtha Raja, jekon Lengthia Raja ineba minga, jean lengthi gangipa, A·chik jomindar saksa ong·achim, uni ge·etanirangchi ia diggiko cho·aha ine agana. Da·alona kingking, ia diggiko, agana man·gijagipa bilrang simsake nitimenga ine uni wilwila songrango donggipa manderang bebe ra·a. Ia diggini gimin rongtale see rakkigiminrang dongjaoba, ia diggiko nike, skangni salrangni A·chikrang maikai janggi tangachim, uarangni gimin ma·sina gita man·a.
The tomb of Mir Jumla II
Gnigipa Mir Jumla, Mughalrangni sipairangni, saksa chubata gadango kam ka·gipa, saksa General ong·achim. Mughal Raja Aurangzebni India a·songko sason ka·miting salrango, Mughalrangni Salaram aro Salgro-Salaram jolrangko sason ka·na re·baanio ua mongsonggipa bakko ra·e kam ka·aha. Uni gopram, Ampationi kilometer chet chel·ao, Assam aro Meghalayani sima ario donggipa song, Thakuranbario donga. Itihasnigitade, 1659 bilsirango, Mughal Raja Aurangzeb uko Bengalni Governor General songaha. Mughal sipai kotokni dal·batgipa ong·e Assam a·dokona napdrabamiting somoirango, uamangni adita sipairang malaria sabisiko man·e, satokaha. ua biapon uamang janggi galna nangaha. 1663 bilsini March jani, 30 tariko, Bengalchi soksrapgijaan, malaria sae Mir Jumlaba janggi galaha aro uko Thakuranbari songni a·bri damsao gopaha. Ia uni gopramko da·alona kingkingba ua songni Mazar Shariff dolrang nirokenga. Mughalrangni sason ka·miting chasongo, Salgro- Salaramni itihasko, uni gopram, manderangni gisikona chanchianiko ra·baa.