South West Garo Hills district-o songdonggipa jatrangara Garo-rang, Koch-rang aro Hajong-rang ong.a.
GARO-RANG: Meghalaya A.doko jalbatgipa jatrangoni Garorang gnigipa ong.a. Me.chik gita chatchi chanrorogipa aro gam-jin on.rorogipa (matrilineal) jatrang a.gilsak gimiko jeljaoba, Garo rangba jat sa ong.paa. Uamangni mongsongbatgipa an.seng-manianiara (festival) Wangala ong.a, jekon chong.motde Songsarek rang Rakario an.seng-mania. Indiba, ia an.seng manianiko jinmaba nikpachina, 100 Drums’ Wangala Festival-o uamangni rite-dakbewalko mesokjole West Garo Hills district o bilsi rikit November jani skanggipa antio ong.atronga, jeon jinmaba bak ra.e nipana man.a.
KOCH-RANG: Koch-rang chengoni somoiode Songsarek ong.achim, indiba da.ode uamang Hindu toromko ja.rika. UNESCO ni gitade Koch ku.sik ara gimajringa gitik dongenggipa ku.sikrangoni ge.sa ong.a. Koch jatrang South West Garo Hills district ni jolo bang.a mongsonggipa mondir rangko rikaha jekai Gandhiparao Chenga Benga Mondir, aro Thakuranbario Maa Kamakhya Mondir (jekon mingsingbegipa Koch Raja Narayana rikaha).
HAJONG-RANG: Koch-ranggitan, Hajong-rangba Hindu toromko jarika aro mongsongbate Kali aro Kamakhya ko olakia. Uamangni ku.sik aganara Assamni Jharua ku.sik rokom ba Bangladeshni Mymensingh jolo agangipako jakkala.